Pasonan

E kuater paso di un prueba di derechonan di mucha
Un prueba di derechonan di mucha ta konsistí di kuater paso. Durante e kuater paso aki bo ta traha un bon análisis di e interes di (gruponan di) mucha evaluando e impakto di un proyekto di lei òf regulashon òf un propuesta di maneho riba e realisashon di e derechonan di mucha. Pues, den e análisis, e derechonan di mucha ta para sentral. P’esei, bo ta investigá e interesnan di mucha relashoná ku e propuesta, i bo ta drenta den kòmbersashon ku mucha tokante di e propuesta (paso 1). Tambe bo ta konsiderá otro interesnan ku e proyekto di lei òf e propuesta di maneho mester protehá (paso 2). Seguidamente, bo ta konsiderá e importansia di e interesnan di mucha – ku ta para promé – i e sobrá interesnan (paso 3). Si e resultado di e prueba di derechonan di mucha ta duna motibu pa hasi’é, bo ta tene kuenta ku esaki den e elaborashon di legislashon, regulashon òf maneho òf bo ta adaptá nan di akuerdo ku esei. Finalmente, bo ta hustifiká e eskohonan ku bo a hasi na e muchanan mes i tur sobrá hende (paso 4).