Chekeo delantá
E pregunta ku ta para sentral den e chekeo delantá ta si e propuesta ku bo ta trahando riba dje ta toka e interes di desaroyo òf e bienestar di mucha. I ku esei, pues, e derechonan di mucha. Na momentu di hasi e chekeo delantá bo por laga bo guia pa dos pregunta:
- Kiko ta e meta di e propuesta?
- E propuesta ku bo ta trahando riba dje ta toka e interes di desaroyo òf e bienestar di mucha, i konsekuentemente, e derechonan di mucha?
Pa determiná si un propuesta ta toka e desaroyo i e bienestar di mucha, segun e Komité di Derechonan di Mucha bo mester konsiderá (komo mínimo) shete elemento⁴. Den e marko aki, e Komité ta indiká ku e lista aki di shete elemento no ta ekshoustivo. Esaki ta nifiká ku – ora ta aplikabel – bo por agregá elementonan adishonal na esakinan. Bo mester inkluí por lo ménos e shete elemento.
Den General Comment 14, e Komité di Derechonan di Mucha a duna un interpretashon di e elementonan aki. Bo por involukrá e splikashon aki den bo promé chekeo i tambe despues den paso 1.
E elementonan aki ta duna un interpretashon pedagógiko na e realisashon di derechonan di mucha. Nan ta nesesario pa un perspektiva di desaroyo favorabel pa mucha.
Den e promé chekeo bo ta usa e shete elemento komo hèrmènt pa evaluá si e propuesta ta toka e interes di desaroyo òf e bienestar di mucha. Den paso 1 di e prueba, ta bolbe ripití e elementonan aki.
Ya ku no ta semper bo ta konsiente di e echo ku bo propuesta tambe ta toka e interesnan di mucha (tantu positivamente komo negativamente) ta importante pa konsiderá tur shete elemento. Verifiká si e propuesta ku bo ta trahando riba dje ta toka e shete elemento.
Paga tinu! Interpretá esaki den sentido amplio. E propuesta tambe por toka mucha indirektamente òf por toka nan riba término largu. Derechonan di mucha mester para na promé lugá ora di redaktá legislashon, regulashonnan i maneho, pues ta preferibel pa tene demasiado prueba di derechonan di mucha en bes di muchu tiki.
Konklushon chekeo delantá
Si e propuesta no toka e interesnan di mucha di niun manera, tampoko den sentido indirekto òf riba término largu, e prueba ta stòp. Si e propuesta sí toka e interesnan di mucha, bo ta sigui ku e kuater paso di e prueba di derechonan di mucha.