Prueba di Derechonan di Mucha
Kuater paso pa yega na e mihó desishonnan pa mucha na momentu di redaktá legislashon, regulashonnan i maneho
Meta di e Prueba di derechonan di mucha
Mucha tin derecho. E derechonan aki ta skirbí den e Tratado di derecho pa mucha. E Prueba di derechonan di mucha aki ta duna bo hèrmèntnan pa pone derechonan di mucha na promé lugá na momentu di duna forma na legislashon, regulashonnan i maneho. E meta di e prueba ta pa garantisá e desaroyo i e bienestar di mucha den tur propuestanan ku ta toka e interesnan di mucha. Finalmente, nos kier pa den tur legislashon, regulashon i maneho ta tuma e mihó desishonnan pa mucha.
Aki bou bo ta haña e pasonan ku bo ta sigui na momentu di hasi e prueba di derechonan di mucha. Riba vários punto bo por sigui klek i sigui lesa den e splikashon. Eiden tin mas splikashon tokante di e diferente pasonan.
Chekeo delantá
E pregunta sentral di e chekeo delantá ta:
E propuesta ku bo ta trahando riba dje ta toka e interes di desaroyo òf e bienestar di mucha, i konsekuentemente, e derechonan di mucha?
Paga tinu! Interpretá esaki den sentido amplio. E propuesta tambe por toka mucha indirektamente (por ehèmpel, atraves di nan mayornan) òf por toka nan riba término largu.
- 1 Identidat di e mucha
- 2 Preservashon di e entorno di famia i kontaktonan importante
- 3 Protekshon i seguridat
- 4 E derecho riba salú
- 5 Mucha vulnerabel òf situashonnan èkstraordinario
- 6 E derecho riba enseñansa
- 7 Derecho di e mucha di duna su opinion
- 8 ...
- 1 Identidat di e mucha
- 2 Preservashon di e entorno di famia i kontaktonan importante
- 3 Protekshon i seguridat
- 4 E derecho riba salú
- 5 Mucha vulnerabel òf situashonnan èkstraordinario
- 6 E derecho riba enseñansa
- 7 Derecho di e mucha di duna su opinion
- 8 ...
Resultado di e chekeo
Si e propuesta no toka e interesnan di mucha, tampoko den sentido indirekto (por ehèmpel, atraves di nan mayornan) òf riba término largu, e prueba ta para. Si e propuesta sí ta toka e interesnan di mucha, bo ta sigui ku e prueba.
E pasonan di e prueba
Bo ta kompletá un prueba di derechonan di mucha den kuater paso. Durante e pasonan aki bo ta analisá kuidadosamente ki impakto un proyekto di lei òf propuesta di maneho tin riba e realisashon di derechonan di mucha. Den e marko aki, e interes di mucha semper ta e enfoke sentral.
1
Investigá e interesnan di mucha
Den e promé paso bo ta investigá e interesnan di mucha. Bo ta profundisá den e elementonan di e chekeo delantá, involukrando diferente fuentenan. Den e paso aki, bo ta involukrá e muchanan enbolbí tambe. Involukrando nan aktivamente den e prueba, bo ta sòru ku nan derechonan i interesnan ta wòrdu representá adekuadamente.
2
Investigá otro interesnan
Banda di e derechonan di mucha sa tin otro interesnan ku un proyekto di lei ta toka. Den e di dos paso aki bo ta identifiká e derechonan aki, pa asina bo haña un bista riba posibel kontradikshonnan òf similaridatnan.
3
Konsiderá e interesnan
Den paso tres bo ta konsiderá e importansia di e diferente interesnan. Den e marko aki, e interesnan di mucha ta na promé lugá. Bo ta evaluá kon e interesnan aki ta relashoná ku e sobrá interesnan ku bo a identifiká den paso 2.
4
Hustifikashon i komunikashon
A base di e konsiderashonnan, si mester bo ta modifiká e proyekto di lei òf e propuesta di maneho. Seguidamente, den e último paso aki bo ta hustifiká klaramente i transparentemente bo eskohonan.
Paso 1
E interesnan di mucha
Den e paso aki bo ta identifiká e interesnan di mucha. Di e manera aki, bo ta haña un bista riba e derechonan di mucha ku e propuesta ta toka (positivamente òf negativamente). Bo ta hasi esaki investigando e interesnan (paso 1A) i involukrando muchanan (paso 1B).
Preguntanan sentral:
- Di ki manera e propuesta ta afektá, direktamente òf indirektamente (por ehèmpel, atraves di e mayornan), e bienestar i e desaroyo di muchanan?
- Kua ta e mihó manera pa protehá e interesnan di mucha den e propuesta?
1A
Investigá e interesnan
Investigá e interesnan di mucha a base di e elementonan ku bo a evaluá ya kaba den e chekeo delantá. E paso aki ta un profundisashon di e chekeo ku bo a hasi delantá. Konsiderá e derechonan di mucha mes tambe. Bo por uza e Matris di impakto pa hasi esei.
Investigá di ki manera e propuesta ta afektá muchanan i ki nan interesnan ta ora ta trata di e propuesta òf tópiko ku bo ta trahando riba dje. Por ta ku un propuesta ta toka e interesnan di tur mucha na Hulanda oropeo i/òf Hulanda karibense. Pero tambe por ta ku e propuesta ta toka e interesnan di un grupo spesífiko di mucha. Komprobá tambe si den e gruponan aki tin mucha den posishonnan vulnerabel òf ku debí na e propuesta ta kaba den posishonnan vulnerabel.
Konsiderá e konsekuensianan òf e impakto tantu riba término kòrtiku komo riba término largu.
Pa e investigashon aki bo por hasi uzo di diferente fuente.
1B
Papia ku mucha
Hiba kòmbersashon ku mucha tokante di e propuesta òf e tópiko ku bo ta trahando riba dje. Hasi esei a base di e resultado di e investigashon di e interesnan di mucha. Pensa bon ku ken bo kier papia, i kua ta e mihó manera pa hiba e kòmbersashon. Kiko bo kier logra ku e propuesta ku bo ta trahando riba dje? Ki opinion muchanan tin tokante di esaki? Kua solushonnan òf opstákulonan nan ta mira?
Den e marko aki, tene kuenta ku e rekísitonan pa partisipashon di mucha.
Paso 2
Investigá otro interesnan
Den e paso aki bo ta identifiká otro interesnan. Por ta ku a identifiká e interesnan aki kaba den e proseso regular di redaktá legislashon, regulashonnan i maneho, por ehèmpel pa medio di e Beleidskompas.
Paso 3
Konsiderá e interesnan.
Den e paso aki bo ta konsiderá e importansia di tur e interesnan.
Paga tinu! E interesnan di mucha ta na promé lugá, pues esakinan tin mas peso ku e sobrá interesnan.
Paso 4
Hustifikashon i komunikashon
Den e paso aki bo ta deskribí e resultado di e prueba di derechonan di mucha. Bo ta inkluí paso 1 te 3 den esaki. Splika kua interesnan di mucha ta hunga un ròl i di ki manera bo a pisa nan den e propuesta. Si ta aplikabel, splika tambe loke bo a adaptá den e propuesta pa pone e derechonan di mucha na promé lugá.
Skribi tur esaki ku palabra simpel den un splikashon serka e propuesta, pa asina e ta kla pa tur hende. I tambe komuniká esaki na e muchanan ku ken bo a papia.
